सदाशिवगड

सदाशिवगड

२ महाराष्ट्रातील छ. शिवाजी महाराजांनी बांधलेल्या किल्ल्यांपैकी एक डोंगरी किल्ला.

सातारा जिल्ह्यातील कराड शहराच्या ईशान्येस सु. ६ किमी.वर कराड-विजापूर मार्गावर तो आहे. येथे गडाच्या तटबंदीचे अवशेष आढळतात. त्यावरून भिंतींची उंची सु. २·५ मीटर असावी. उत्तरेकडे खोल दरी असून त्या बाजूला प्रवेशद्वार होते; पण ते खचलेले आहे.

किल्ल्यावर चार भक्कम बुरूज होते. तेही अवशेष रूपात आढळतात.

किल्ल्यावरील प्रशस्त पठार सु. ९ हेक्टर असून पाण्याची टाकी व तळी कोरडी पडली आहेत.

किल्ल्यावर महादेवाचे एक मंदिर असून दरवर्षी श्रावण महिन्यात सोमवारी (शेवटच्या) तेथे छोटी यात्रा भरते.

पायथ्याशी त्याच नावाचे खेडे असून तेथे समाजमंदिर आहे.

लेखक - सु. र. देशपांडे

स्त्रोत: मराठी विश्वकोश