অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

योगसाधना ... निरंतन शक्ती

योगसाधना ... निरंतन शक्ती

समाधानाय सौख्याय, निरोगत्वाय जीवने

योगमेवाभ्यसेत प्राज्ञ, यथाशक्ती निरंतरम...

आपण योगासने यशाशक्ती व निरंतर केल्यास जीवनात समाधान, सौख्य व निरोगत्व प्राप्त होते. धर्म, संप्रदाय, भाषा, लिंग, वय, आर्थिक परिस्थिती या सर्व भेदभावाच्या पलीकडे जाऊन संपूर्ण मानवजातीच्या उद्धारासाठी समाधान, सौख्य व निरोगत्व मिळण्याकरिता योग साधना करण्याचा महामंत्र आपल्या पूर्वजांनी दिला आहे. दरवर्षी 21 जून हा दिवस आंतरराष्ट्रीय योग दिवस म्हणून साजरा केला जातो यानिमित्ताने...

विज्ञान तंत्रज्ञानामुळे उपभोगांच्या साधनांची निर्मिती वेगाने होत आहे. त्यामुळे मनुष्य हा भौतिक सुख सोयींच्या मागे लागून स्वत:चा अभ्यास, पठण, मनन आणि प्रकृतीकडे दुर्लक्ष करीत आहे. तंत्रज्ञानाच्या जोरावर निसर्गावर मात करण्याचा प्रयत्न करत असला तरीही मनुष्याला निसर्गापुढे मान झुकवावीच लागते. सुखी व समृद्ध जीवन जगताना मानवी शरीरात निर्माण होणारे विकार हे निसर्ग नियम सोडल्यामुळेच होत आहेत. त्यामुळे नित्यनियमाने योगाभ्यास केल्यास रोगापासून दूर राहणे शक्य होते.

डिसेंबर 2014 मध्ये संयुक्त राष्ट्रांच्या आमसभेत योग दिनाचा प्रस्ताव संमत करण्यात आला. त्याला 177 राष्ट्रांनी पाठिंबा दिला आहे. तेव्हापासून 21 जून हा दिवस आंतरराष्ट्रीय योग दिन म्हणून साजरा केला जातो. योगशास्त्र ही प्रत्येक साधकाला शारीरिक क्षमता, मानसिक स्थिरता, भावनिक शांतता आणि आध्यात्मिक संपन्नता प्रदान करणारी बिन खर्चाची गुरूकिल्ली आहे. योग म्हणजे शारीरिक कसरत नाही. योग ही एक नियमित व उचित साधना आहे. जी आरोग्याकरिता लाभदायक आहे. योगामध्ये निवडक आसने, प्राणायम, मुद्रा बंध, शुद्धीक्रिया, धारणा, ध्यान यांचा सुंदर संगम आहे. नित्य नियमित योगासने, केल्यास लहान मुले, तरूण तसेच ज्येष्ठ नागरिक निरंतर कार्यक्षम राहू शकतात. आजच्या धकाधकीच्या जीवन शैलीमुळे शरीराला पाहिजे तसा व्यायाम मिळत नाही. परिणामी अनेक आजारांचा सामना करावा लागतो. पण शारीरिक आजारांवर योगाने मात करू शकतो. तसेच योगासने निरंतर करीत राहिल्यास आजार होत नाही.

शारीरिक आणि मानसिक स्वास्थ तसेच बौद्धिक विकास ज्याने होईल असा व्यायाम म्हणजे आसने, प्राणायाम, योगिक क्रिया आहे. आसने करताना वाकणे, उचलणे व वळणे या तीन शारीरिक हालचाली होतात. काही सुलभ आसने आबालवृद्ध, स्त्री-पुरूषांनी करून आजाराला दूर ठेवण्याचा व आरोग्य सुधारण्याचा अनुभव घ्यावा.

सर्वांगाम व मस्त्यासन, आकर्ण धनुरासन, भूजंगासन, दीर्घश्वसन, हलासन, श्वासन, शिर्षासन, अश्विनीमुद्रा, ताडासन, कोनासन, सूर्य नमस्कार, पवन मुक्तासन, योगमुद्रा, धनुरासन, पद्मासन, प्राणायाम व ओंकार हे साधारणत: 40 ते 45 मिनिटे केल्यास सुदृढ, शुद्ध अंत:करण आणि मानसिक शांती लाभते. योगासने यथाशक्ती निरंतर केल्यास जीवनात समाधान, सौख्य व निरोगत्व प्राप्त होते. तसेच भक्तीयोग, कर्मयोग, राजयोग, ज्ञानयोग, हटयोग करून जीवनात यश मिळवू शकतो. कोणत्याही परिस्थितीचा आनंदाने सामना करू शकतो. तेव्हा 21 जून रोजी या सर्वात मोठ्या दिवसापासून योग नियमित करण्याचा संकल्प करूया...

 

सारिका फुलाडी
माहिती व जनसंपर्क कार्यालय,
नागपूर.

माहिती स्रोत: महान्युज

अंतिम सुधारित : 6/5/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate