वेळेत निदान, वेळेत उपचार यातूनच कुष्ठरोगाची मुक्ती

राष्ट्रीय कुष्ठरोग निर्मुलन कार्यक्रमांतर्गत नांदेड जिल्ह्यातील स्पर्श कुष्ठरोग जनजागृती अभियान व विशेष कुष्ठरोग शोध मोहीम 30 जानेवारी ते 13 फेब्रुवारी 2017 या कालावधीत राबविण्यात येणार आहे. तसेच 6 ते 21 फेब्रुवारी यादरम्यान कुष्ठरोग सर्वेक्षण मोहीमही राबविण्यात येणार आहे. त्याविषयी ही माहिती...

आपल्याकडे कुष्ठरोगाची समस्या आजही दिसून येते. खरोखर कुष्ठरोग हा एक किरकोळ आजार आहे. तो मायकोबॅक्टेरियम लेप्री या जीवाणूमुळे होतो. कुष्ठरोग हा काही स्पर्शाने होणारा आजार नाही. या रोगाचे निदान व उपचार सर्व सरकारी दवाखान्यात तसेच आरोग्य केंद्रामध्ये मोफत केला जातो. लवकर वेळेत निदान व उपचाराने कुष्ठरोग पूर्ण बरा होतो. पुढे निर्माण होणाऱ्या शारीरिक विकृतीपासून बचाव होतो. कुष्ठरोगाच्या तीव्रतेनुसार त्याचा उपचार सहा महिने किंवा बारा महिने इतका आहे.

कुष्ठरोगाची लक्षणे

• त्वचेवर फिक्कट किंवा लालसर रंगाचा एक किंवा एकापेक्षा जास्त चट्टे असतात.
• हा चट्टा बधीर व कोरडा असतो.
  
• चट्टा न खाजणारा, न दुखणारा, न घाम येणारा असतो.
  
• शरीरावर, चेहऱ्यावर, भुवयावर गाठी येतात किंवा चेहऱ्याची त्वचा तेलकट दिसते.
  
• हाता-पायांना कोरडेपणा, बधीरपणा तसेच अशक्तपणा येतो.
  
• रुग्णाला या बाबी आढळल्यास जवळच्या शासकीय दवाखान्यात कुष्ठरोगाची तपासणी करून घ्यावी.
  
• एमडीटी हे औषध कुष्ठरोगावर चांगले प्रभावशाली ( गुणकारी ) औषध आहे. सर्व सरकारी दवाखाने व आरोग्य केंद्रामध्ये हे औषध मोफत उपलब्ध करुन दिले जाते.